ഇന്ത്യയിലേക്ക് ഒറ്റയ്ക്ക് യാത്ര തിരിക്കും മുൻപ് ലഭിച്ച മുന്നറിയിപ്പുകളെല്ലാം തെറ്റാണെന്ന് തെളിയിക്കുന്ന അനുഭവങ്ങൾ പങ്കുവെച്ച് പോർച്ചുഗീസ് യാത്രാ ബ്ലോഗർ. ഇന്ത്യക്കാരായ പുരുഷന്മാരിൽ നിന്ന് നേരിടേണ്ടി വന്ന സൗഹൃദപരമായ ഇടപെടലുകൾ തന്‍റെ മുൻധാരണകളെ പൂർണമായും മാറ്റിമറിച്ചുവെന്ന് ‘ആന’ സോഷ്യൽ മീഡിയയിൽ കുറിച്ചു.
ഇന്ത്യൻ യാത്രയ്ക്കിടെ തനിക്ക് നേരിടേണ്ടി വന്ന അനുഭവങ്ങളുടെ ദൃശ്യങ്ങൾ ഉൾപ്പെടുത്തി ആന ഇൻസ്റ്റാഗ്രാമിൽ പങ്കുവെച്ച വീഡിയോ ഇപ്പോൾ വൈറലാണ്.
“നീ തനിയെ ഇന്ത്യയിലേക്ക് പോകുകയാണോ? അവിടുത്തെ പുരുഷന്മാരെ സൂക്ഷിക്കണം” എന്ന മുന്നറിയിപ്പോടെയാണ് ആനയുടെ ഇൻസ്റ്റാഗ്രാം വീഡിയോ ആരംഭിക്കുന്നത്. ഇന്ത്യയിലെത്തുന്നതിന് മുൻപ് ആക്രമണങ്ങളെക്കുറിച്ചും, മോശം പെരുമാറ്റത്തെക്കുറിച്ചും, മോഷണങ്ങളെക്കുറിച്ചുമെല്ലാം പലരും തനിക്ക് മുന്നറിയിപ്പ് നൽകിയിരുന്നതായും ആന പറയുന്നു.
ഈ ഭയം കാരണം യാത്രയുടെ ആദ്യ മാസത്തിൽ ലിഫ്റ്റ് ചോദിച്ച് യാത്ര ചെയ്യുന്ന ശീലം താൻ പൂർണമായും ഒഴിവാക്കിയിരുന്നുവെന്നും അവർ വ്യക്തമാക്കി. എന്നാൽ ഇന്ത്യയിലെത്തിയ ശേഷമുള്ള അനുഭവങ്ങൾ മറ്റൊന്നായിരുന്നു. യാത്രയ്ക്കിടയിൽ കണ്ടുമുട്ടിയ ഇന്ത്യൻ പുരുഷന്മാർ തന്നോട് വളരെ സ്നേഹത്തോടും സൗഹൃദത്തോടും കൂടിയാണ് പെരുമാറിയതെന്ന് വീഡിയോ ദൃശ്യങ്ങൾ വ്യക്തമാക്കുന്നു.
ഫോൺ തരാറിലായപ്പോൾ ഒരു അപരിചിതൻ രണ്ട് മണിക്കൂറോളം സമയമെടുത്ത് അത് ശരിയാക്കി നൽകിയ അനുഭവവും ആന പങ്കുവെച്ചു. യാത്രയിൽ കണ്ടുമുട്ടിയ പലരും ഇപ്പോൾ തന്‍റെ ആജീവനാന്ത സുഹൃത്തുക്കളായി മാറിയെന്നും അവർ കൂട്ടിച്ചേർത്തു.
ഇന്ത്യ പൂർണമായും സുരക്ഷിതമാണെന്നോ വലിയ നഗരങ്ങളിൽ ജാഗ്രത പാലിക്കേണ്ടതില്ലെന്നോ താൻ അവകാശപ്പെടുന്നില്ലെന്ന് ആന വ്യക്തമാക്കുന്നുണ്ട്. മറ്റ് യാത്രക്കാർ നേരിട്ടിട്ടുള്ള ദുരനുഭവങ്ങളെ താൻ നിസാരവത്കരിക്കുന്നില്ലെന്നും, എന്നാൽ വെറുതെ ഭയം മനസിൽ വെച്ച് ഇന്ത്യ സന്ദർശിക്കാതിരിക്കരുതെന്നാണ് തനിക്ക് പറയാനുള്ളതെന്നും അവർ കുറിച്ചു.
സോഷ്യൽ മീഡിയയിൽ പ്രചരിക്കുന്ന വീഡിയോയ്ക്ക് മികച്ച പ്രതികരണമാണ് ഇന്ത്യൻ ഉപയോക്താക്കളിൽ നിന്ന് ലഭിക്കുന്നത്. ലോകത്ത് എല്ലായിടത്തും നല്ലതും ചീത്തയുമായ ആളുകളുണ്ടെന്നും ഇന്ത്യയുടെ നല്ല വശങ്ങൾ കാണിച്ചുതന്നതിന് നന്ദിയുണ്ടെന്നും പലരും കമൻ്റ് ചെയ്തു. അതേസമയം, വിദേശ വനിതയ്ക്ക് ലഭിച്ച സുരക്ഷിതമായ അനുഭവത്തെ സ്വാഗതം ചെയ്യുമ്പോഴും യാത്രകളിൽ ആവശ്യമായ മുൻകരുതലുകൾ എടുക്കണമെന്ന് ചിലർ ഓർമ്മിപ്പിക്കുകയും ചെയ്തു.
